UPSC Success Story: भारतात दरवर्षी लाखो विद्यार्थी UPSC नागरी सेवा परीक्षेत बसतात, पण फक्त काही मोजकेच उमेदवार IAS, IPS, IRS किंवा IFS सारख्या प्रतिष्ठित पदांवर पोहोचतात. या निवडक उमेदवारांमध्ये तामिळनाडूतील दोन बहिणींची नावे विशेष महत्त्वाची आहेत – सुष्मिता रामनाथन (Sushmitha Ramanathan) आणि ईश्वर्या रामनाथन (Easwariya Ramanathan). गरीब शेतकरी कुटुंबातून आलेल्या या दोघींनी प्रतिकूल परिस्थितीला न जुमानता UPSC मध्ये यश मिळवले आहे.
त्सुनामीने उद्ध्वस्त झालेले बालपण
2004 च्या त्सुनामीमध्ये सुष्मिता आणि ईश्वर्याचे घर उद्ध्वस्त झाले. लहान वयातच त्यांनी आर्थिक आणि मानसिक संकटांचा सामना केला. तरीही शिक्षण थांबवले नाही. आई-वडिलांनी शेती करून आणि मजुरी करून त्यांना शिकवले. या संघर्षाने त्यांच्यात जिद्द आणि चिकाटी निर्माण केली.
ईश्वर्याचा IAS पर्यंतचा प्रवास
ईश्वर्याने 2018 मध्ये पहिल्याच प्रयत्नात UPSC परीक्षा उत्तीर्ण केली. त्या वेळी तिला 628 वा क्रमांक मिळाला आणि तिची निवड रेल्वे अकाउंट्स सर्व्हिस (RAS) मध्ये झाली. मात्र, तिला आपल्या रँकने समाधान नव्हते.
त्यामुळे तिने पुन्हा प्रयत्न केला. 2019 मध्ये दुसऱ्याच प्रयत्नात तिने 44 वा क्रमांक (AIR 44) मिळवला आणि केवळ 22 व्या वर्षी IAS अधिकारी बनली. सध्या ती तामिळनाडूतील थूथुकुडी जिल्ह्यात अतिरिक्त जिल्हाधिकारी (Additional Collector) म्हणून कार्यरत आहे.
सुष्मिताचा सातत्यपूर्ण संघर्ष
सुष्मिताचा प्रवास मात्र खूप कठीण होता. सलग पाच प्रयत्नांमध्ये तिला अपयश आले. प्रत्येक वेळी अपयश मिळाल्यानंतरही तिने हार मानली नाही. अखेर 2022 मध्ये सहाव्या प्रयत्नात तिने 528 वा क्रमांक (AIR 528) मिळवला आणि IPS अधिकारी बनली. सध्या ती आंध्र प्रदेश केडरमध्ये काकीनाडा येथे सहाय्यक पोलीस अधीक्षक (ASP) म्हणून कार्यरत आहे.
दोघी बहिणींच्या यशातून मिळणारी शिकवण
सुष्मिता आणि ईश्वर्या या दोन्ही बहिणींनी सिद्ध केले की परिस्थिती कितीही कठीण असली तरी ध्येय ठरवलं आणि प्रयत्न सुरू ठेवले तर यश मिळतेच. एका गरीब शेतकरी कुटुंबातील मुलींनी IAS आणि IPS होऊन देशसेवा करण्याचा मार्ग निवडला.
त्यांची यशोगाथा आज हजारो उमेदवारांसाठी प्रेरणादायी आहे. UPSC सारख्या कठीण परीक्षेत टिकून राहण्यासाठी जिद्द, आत्मविश्वास आणि सातत्यपूर्ण मेहनत या गोष्टी किती महत्त्वाच्या आहेत, हे त्यांच्या कथेतून स्पष्ट होते.