अल्लू अर्जुनच्या बहुप्रतीक्षित ‘पुष्पा 2: द रुल’ या चित्रपटाचा ट्रेलर नुकताच प्रदर्शित झाला असून, सोशल मीडियावर याचीच जोरदार चर्चा आहे. या ट्रेलरमध्ये अनेक उत्कंठावर्धक दृश्यं आणि पात्रं दाखवली आहेत. मात्र, एका विशिष्ट भूमिकेनं नेटकऱ्यांचं विशेष लक्ष वेधलं आहे.
ट्रेलरमधील ‘गंगम्मा जत्रा’ या सीक्वेन्समध्ये एक विचित्र आणि भयंकर वेशभूषेत अभिनेता दिसतो. अर्ध टक्कल, गळ्यात चप्पलांची माळ, चेहऱ्यावर काळा व लाल रंगाचा विभाजन, कपाळावर व भुवयांवर गंध, कानात झुमके, आणि नाकात दागिना अशा अवतारामुळे ही भूमिका प्रेक्षकांच्या मनात ठसली आहे.
हा अभिनेता दुसरा तिसरा कोणी नसून तेलुगू चित्रपटसृष्टीतील अभिनेता श्रीतेज आहे. श्रीतेजने या ट्रेलरमध्ये पुष्पाराजच्या सावत्र भावाची भूमिका साकारली आहे, ज्याचं नाव मोलेटी धर्म राज आहे. ‘गंगम्मा जत्रा’च्या दृश्यात श्रीतेजचा हा भयंकर अवतार कथानकाच्या उत्कंठेला वेगळ्या उंचीवर नेतो.
गंगम्मा तल्ली जत्रा ही तिरुपतीमधील एक प्रचलित प्रथा आहे, जिथे पुरुष महिलांच्या पोशाखात साजरे होतात आणि गंगम्मेचं रूप धारण करतात. ही देवी वाईट प्रवृत्तींचा नाश करणारी मानली जाते. चित्रपटातील या प्रसंगात धर्मराजच्या भूमिकेत श्रीतेजची वेशभूषा व अभिनय भयभीत करणारा वाटतो.
ट्रेलरमधील इतर दृश्यांवरून असा अंदाज लावला जात आहे की, धर्मराजच्या हातून पुष्पाराजची पत्नी श्रीवल्ली (रश्मिका मंदाना) हिच्या मृत्यूसाठी काहीतरी कारण होऊ शकतं. याच विषयावरून पुष्पाराज आणि धर्मराज यांच्यात मोठा संघर्ष होईल, अशी चर्चा आहे.
श्रीतेजने 2013 साली अभिनयात पदार्पण केलं होतं आणि आत्तापर्यंत वायएस राजा शेखर रेड्डी व एन. चंद्राबाबू नायडू यांच्या भूमिका साकारत त्यांनी स्वतःचं वेगळं स्थान निर्माण केलं आहे. मात्र, ‘पुष्पा 2’ मधील ही भूमिका त्यांच्या कारकिर्दीत सर्वाधिक लक्षवेधी ठरेल, असं दिसतंय.
‘पुष्पा 2: द रुल’ हा चित्रपट प्रेक्षकांना पुन्हा एकदा थरारक प्रवासावर घेऊन जाण्यास सज्ज झाला आहे.
