भारतीय कसोटी संघाचा कर्णधार शुभमन गिलने इंग्लंडविरुद्धच्या पाचव्या कसोटी सामन्यात ऐतिहासिक विक्रम प्रस्थापित करत भारतीय क्रिकेटमध्ये नव्या पर्वाची नांदी केली आहे. ओव्हल येथे सुरू असलेल्या पाचव्या कसोटी सामन्याच्या पहिल्या दिवशी, गिलने केवळ १५ धावा करताच एक असा विक्रम मोडला जो तब्बल ४७ वर्षांपासून अबाधित होता.
गिलने या मालिकेत आतापर्यंत एकूण ७३३ धावा केल्या असून, तो आता एका कसोटी मालिकेत कर्णधार म्हणून सर्वाधिक धावा करणारा भारतीय फलंदाज बनला आहे. याआधी हा विक्रम सुनील गावसकर यांच्या नावावर होता. गावसकर यांनी १९७८-७९ च्या वेस्ट इंडिज दौऱ्यात ७३२ धावा केल्या होत्या.
गिलची ही कामगिरी केवळ भारतापुरतीच मर्यादित नाही. दक्षिण आफ्रिका, इंग्लंड, न्यूझीलंड आणि ऑस्ट्रेलिया म्हणजेच ‘SENA’ देशांमध्ये एका मालिकेत कर्णधार म्हणून सर्वाधिक धावा करणारा फलंदाज ठरण्याचा विक्रमही त्याने केला आहे. याआधी वेस्ट इंडिजचे दिग्गज सर गॅरी सोबर्स यांनी १९६६ मध्ये इंग्लंड दौऱ्यात ७२२ धावा केल्या होत्या, मात्र गिलने त्याही पुढे झेप घेतली.
शुभमन गिलची विक्रमी कामगिरी:
- ७३३ धावा – शुभमन गिल (विरुद्ध इंग्लंड, २०२५)
- ७३२ धावा – सुनील गावसकर (विरुद्ध वेस्ट इंडिज, १९७८/७९)
- ६५५ धावा – विराट कोहली (विरुद्ध इंग्लंड, २०१६/१७)
- ६१० धावा – विराट कोहली (विरुद्ध श्रीलंका, २०१७/१८)
- ५९३ धावा – विराट कोहली (विरुद्ध इंग्लंड, २०१८)
गिलने या मालिकेत उत्कृष्ट सातत्य दाखवत भारतीय फलंदाजीला मजबुती दिली आहे. सामन्याच्या पहिल्या दिवशी, के.एल. राहुल बाद झाल्यानंतर गिल फलंदाजीला आला आणि आपल्या सहाव्या चेंडूवर पहिली धाव घेताच विक्रम रचला. त्याचे या मालिकेतील धावांचे योगदान संघाच्या कामगिरीसाठी अत्यंत मोलाचे ठरले आहे.
या ऐतिहासिक कामगिरीमुळे गिलचा संघातील प्रभाव अधिक मजबूत झाला आहे. केवळ एक उत्कृष्ट फलंदाज नव्हे, तर प्रेरणादायी कर्णधार म्हणून त्याने आपले स्थान सिद्ध केले आहे. भारतीय कसोटी क्रिकेटच्या नव्या युगाचा आरंभ शुभमन गिलच्या नेतृत्वातून होत असल्याचे चित्र आहे.