जयपूर – राजस्थान रॉयल्सचा स्टार खेळाडू आणि 2021 पासूनचा कर्णधार संजू सॅमसनने इंडियन प्रीमियर लीग (IPL) 2026 हंगामापूर्वी संघाकडून स्वत:ला रिलीज किंवा ट्रेड करण्याची औपचारिक मागणी केली आहे. IPL 2025 मेगा लिलावाआधी राजस्थानने त्याला तब्बल 18 कोटी रुपयांत कायम ठेवले होते. सॅमसनने आतापर्यंत 4,000 हून अधिक धावा आणि 149 सामने खेळून संघासाठी सर्वाधिक सामने व धावा करणारा खेळाडू म्हणून नोंद केली आहे.
मात्र, 2025 हंगामात राजस्थान रॉयल्सचा निराशाजनक प्रवास झाला आणि संघ नवव्या स्थानावर राहिला. याच काळात सॅमसन हाताच्या दुखापतीमुळे काही सामने गमावले. या सर्वामुळे खेळाडू आणि व्यवस्थापन यांच्यात तणाव निर्माण झाल्याची चर्चा आहे.
बॅटिंग ऑर्डरवरून वाद
Cricbuzz च्या वृत्तानुसार, 2025 हंगामात सॅमसनला सलामीऐवजी तिसऱ्या क्रमांकावर पाठवण्याचा निर्णय घेतला गेला. यामागे तरुण फलंदाज वैभव सूर्यवंशी आणि यशस्वी जयस्वाल यांच्या उत्कृष्ट सलामी जोडीचे प्रदर्शन कारणीभूत होते. मात्र, सॅमसनला भारताच्या T20I संघात सलामीवीर म्हणून स्थान मिळवण्याची महत्त्वाकांक्षा असल्याने हा बदल त्याला पटला नाही.
राहुल द्रविडसोबत मतभेदाच्या अफवा
मुख्य प्रशिक्षक राहुल द्रविडसोबतही मतभेद असल्याच्या चर्चा एप्रिल 2025 मध्ये दिल्ली कॅपिटल्सविरुद्धच्या सामन्यानंतर जोर धरल्या. मात्र, द्रविडने या अफवा फेटाळून लावल्या आणि सॅमसनसोबत उत्तम नाते असल्याचे सांगितले.
ट्रेडसाठी इतर संघांशी चर्चा
मिळालेल्या माहितीनुसार, राजस्थान रॉयल्सने सॅमसनच्या ट्रेडसाठी इतर काही फ्रँचायझींशी प्राथमिक चर्चा केली आहे. चेन्नई सुपर किंग्ज (CSK) सॅमसनला घेण्यात उत्सुक आहे, पण 18 कोटींच्या रकमेमुळे आर्थिक अडचणींचा सामना करावा लागेल. त्यासाठी CSK ला काही मोठे खेळाडू रिलीज करावे लागतील किंवा बेंचवरील अनेक खेळाडू सोडावे लागतील.
तथापि, सॅमसनचा करार IPL 2027 पर्यंत राजस्थानसोबत आहे. त्यामुळे कोणताही बदल करण्यासाठी फ्रँचायझीची मंजुरी आवश्यक आहे. पुढील काही महिन्यांत हा वाद सुटतो का, की IPL 2026 मध्ये सॅमसन नवीन संघाच्या जर्सीत दिसतो, याकडे क्रिकेटप्रेमींचे लक्ष लागले आहे.