कॅनडामधील कॅनानास्किस येथे G7 शिखर परिषद २०२५ पार पडत आहे. या परिषदेत भारताचे पंतप्रधान नरेंद्र मोदी यांनी सहभाग नोंदवला असून, ही त्यांची सलग सहावी G7 उपस्थिती आहे. परिषदेत हवामान बदल, ऊर्जा सुरक्षा, आर्टिफिशियल इंटेलिजन्स (AI), व्यापार आणि जागतिक सुरक्षा या महत्त्वाच्या विषयांवर चर्चा सुरू आहे.
या बैठकीचे अध्यक्षस्थान कॅनडाचे पंतप्रधान मार्क कार्नी यांनी भूषवले आहे. पंतप्रधान मोदी यांची उपस्थिती भारताच्या वाढत्या जागतिक प्रभावाचे प्रतीक मानली जात आहे. जागतिक दक्षिण देशांच्या मुद्द्यांवर त्यांनी विशेष भर दिला आहे.
दरम्यान, इस्रायल आणि इराणमधील संघर्ष वाढत असल्याने अमेरिकेचे राष्ट्राध्यक्ष डोनाल्ड ट्रम्प यांनी परिषद अर्धवट सोडून अमेरिकेकडे प्रयाण केले आहे. रवाना होण्याआधी त्यांनी इस्रायलच्या स्वसंरक्षणाच्या हक्काला पाठिंबा दिला आणि इराणच्या भूमिकेवर टीका केली. परिषदेनं गाझामधील तातडीच्या शस्त्रसंधीची मागणी केली आहे.
युक्रेन संकटावरही बैठकीत लक्ष केंद्रित करण्यात आले आहे. युक्रेनचे राष्ट्राध्यक्ष वोलोदिमीर झेलेन्स्की यांनी रशियावर कठोर निर्बंध लादण्याची आणि लष्करी मदतीची मागणी केली आहे.
पंतप्रधान मोदी यांची अनेक जागतिक नेत्यांशी द्विपक्षीय चर्चा अपेक्षित आहे. या चर्चांमध्ये ऊर्जा क्षेत्र, डिजिटल तंत्रज्ञान, AI सहकार्य आणि गुंतवणुकीवर विशेष भर दिला जाणार आहे. कॅलगरीतील भारतीय समुदायाने मोदी यांचे जोरदार स्वागत केले.
परिषद १७ जूनपर्यंत सुरू राहणार असून, जागतिक धोरणात्मक निर्णयांत भारताची भूमिका निर्णायक ठरण्याची शक्यता आहे.
