उतन ते विरार दरम्यान तब्बल २५ किलोमीटर लांबीच्या सागरी सेतू प्रकल्पाला मंजुरी मिळाली असून, यामुळे पालघर जिल्ह्यातील दक्षिण वळणाला मोठी गती मिळणार आहे. एकूण ८६ लाख ८० हजार चौ.मी. क्षेत्रफळ असलेल्या या प्रकल्पाचे नियोजन मुंबई महानगर प्राधिकरण (MMRDA) मार्फत करण्यात आले आहे. मुंबई-उरण नंतरचा हा दुसरा सर्वात मोठा सागरी सेतू ठरणार आहे.
या सेतूची रचना १९ मीटर खोल समुद्रात पायलिंगद्वारे होणार आहे. प्राधिकरणाच्या मते, या प्रकल्पामुळे सागरी जीवनावर कोणताही धोका पोहोचणार नाही. प्रकल्पाला सीआयझेड (CRZ) ची परवानगी प्राप्त झाली असून, त्यामुळे कामाला गती मिळणार आहे.
सीआयझेड विभागानेही स्पष्ट केले आहे की, प्रकल्पामुळे खारफुटी वन्यजीव व सागरी जैवविविधतेला हानी पोहोचणार नाही. यासाठी चेन्नई येथील “इन्स्टिट्यूट ऑफ रिमोट सेन्सिंग” संस्थेने उपग्रहाच्या आधारे पर्यावरणीय अभ्यास सादर केला होता. त्यानंतरच परवानगी दिली गेली.
झाडांचे पुनर्वनीकरण आणि वन्यजीव संवर्धन
उतन जॉइंटसाठी ८.७१ हेक्टर आणि विरारसाठी ६.६८ हेक्टर जमीन संपादित करण्यात आली आहे. यासाठी ४२० झाडांची तोड होणार असून, बदली स्वरूपात ५२ हजार नवीन झाडे लावली जातील. याशिवाय ५ पट अधिक क्षेत्रावर नववेनीकरण करण्यात येणार आहे. विशेष म्हणजे ५.२० हेक्टर क्षेत्र तुंगारेश्वर अभयारण्याच्या संवेदनशील भागाशी संलग्न असल्याने अधिक खबरदारी घेतली जात आहे. या क्षेत्रात १.६७ हेक्टरमधील झाडांची तोड आवश्यक ठरणार आहे.
प्रकल्पाचा खर्च व वेळापत्रक
या सागरी सेतू प्रकल्पासाठी ५७,००० कोटींचा खर्च अपेक्षित असून, पुढील पाच वर्षांत हा प्रकल्प पूर्ण होण्याचे लक्ष्य आहे. खोदकामाच्या वेळी १०५ डेसिबलपेक्षा अधिक आवाज न करण्याचेही नियोजन करण्यात आले आहे, जेणेकरून पर्यावरणीय परिणाम टाळता येतील. या प्रकल्पामुळे भरती प्रक्रियेवर कोणताही परिणाम होणार नाही.
पालघरसाठी ऐतिहासिक टप्पा
मुंबई-उरण सागरी सेतूनंतरचा हा सर्वात मोठा सागरी प्रकल्प असून, पालघरमधील बंदरांची आणि दक्षिण वळण वाहतुकीची कार्यक्षमता वाढवण्यासाठी तो उपयुक्त ठरणार आहे. चौथ्या मुंबईच्या आराखड्याचा भाग म्हणून या सेतूला विशेष महत्त्व आहे.