सरकार देणार मागेल त्याला सौर कृषी पंप योजना; आवश्यक कागदपत्रे, निकष आणि अर्ज कसा करावा?

by

Magel Tyala Saur Krushi Pump Yojana: मागेल त्याला सौर कृषी पंप योजना’ ही शासनाने सुरू केलेली एक महत्त्वपूर्ण योजना आहे, ज्याद्वारे शेतकऱ्यांना सिंचनासाठी सौर कृषी पंप दिले जातात. शेतकऱ्यांना ही योजना अधिक शाश्वत व कमी खर्चिक करून मिळावी, हा या योजनेचा उद्देश आहे. योजनेअंतर्गत अर्ज करण्याची पद्धत, पात्रता, आवश्यक कागदपत्रे, तसेच योजनेची वैशिष्ट्ये याविषयी अधिक माहिती खाली दिली आहे.

योजनेची वैशिष्ट्ये



1. सिंचनासाठी स्वतंत्र व शाश्वत योजना: शेतकऱ्यांना सिंचनासाठी हक्काची सौर ऊर्जा आधारित शाश्वत योजना उपलब्ध होईल.


2. सर्वसाधारण गटासाठी कमी भर: या योजनेअंतर्गत सर्वसाधारण गटातील शेतकऱ्यांना फक्त 10% भरून संपूर्ण सौर पॅनल्स व कृषी पंप सेट मिळेल.


3. अनुसूचित जाती-जमातींसाठी विशेष सुविधा: अनुसूचित जाती आणि जमातीच्या शेतकऱ्यांसाठी फक्त 5% रक्कम भरण्याची आवश्यकता आहे.


4. अनुदानाचा लाभ: उर्वरित रक्कम केंद्र आणि राज्य सरकारकडून अनुदानाद्वारे दिली जाईल. यामध्ये 3 ते 7.5 एचपी क्षमता असलेले पंप उपलब्ध आहेत. शिवाय, पंपला पाच वर्षांची दुरुस्ती हमी दिली जाते.

लाभार्थी निवडीचे निकष


1. जमिनीची मर्यादा: 2.5 एकरपर्यंत जमीनधारकांना 3 एचपी क्षमतेचा पंप, 2.51 ते 5 एकर जमिनीसाठी 5 एचपी पंप, तर 5 एकरपेक्षा जास्त जमिनीच्या मालकांना 7.5 एचपी क्षमतेचा पंप दिला जाईल.


2. पाण्याचे स्त्रोत असलेले शेतकरी: ज्यांच्या जमिनीजवळ वैयक्तिक किंवा सामुदायिक शेततळे, विहिरी, बोअरवेल अथवा बारमाही वाहणारी नदी/नाले आहेत, ते शेतकरी योजनेसाठी पात्र ठरतील.


3. महावितरण प्रमाणपत्र: बोअरवेल, विहीर, नदी या स्थळांवर शाश्वत पाण्याचा स्त्रोत असल्याची खात्री महावितरणकडून केली जाईल. तथापि, जलसंधारण कामाच्या पाणी जिरविण्याच्या पाणीसाठ्यांतील पाणी उपसण्यासाठी हे पंप वापरता येणार नाहीत.


4. अटल व मुख्यमंत्री सौर कृषी पंप योजना लाभ न घेतलेले शेतकरी: ज्या शेतकऱ्यांनी पूर्वीच्या योजनांचा लाभ घेतला नाही, त्यांनाही या योजनेअंतर्गत लाभ मिळेल.

आवश्यक कागदपत्रे



7/12 उतारा (जलस्रोत नोंद असावी)

मालकांचा ना हरकत दाखला (200 रु. स्टॅम्प पेपरवर आवश्यक)

आधार कार्ड

बँक पासबूक

पासपोर्ट आकाराचा फोटो

जातीचे प्रमाणपत्र (अनुसूचित जाती-जमातीसाठी)

पाण्याचा स्त्रोत डार्क झोनमध्ये असल्याचे प्रमाणपत्र

अर्ज कसा करावा?

योजनेचा लाभ घेण्यासाठी SOLAR MTSKPY पोर्टलला भेट द्या. त्यामध्ये ‘सुविधा’ या बटणावर क्लिक करून अर्ज भरावा. अर्जामध्ये पुढील तपशील भरावा लागेल:

1. वैयक्तिक माहिती


2. रहिवासी पत्ता


3. जमिनीची माहिती


4. कृषी तपशील


5. बँक तपशील



अर्ज भरल्यानंतर तो सबमिट करा. सबमिट केल्यानंतर तुम्हाला अर्जाची पोहोच पावती मिळेल. अर्ज भरताना काही अडचण आल्यास तालुकास्तरावरील महावितरण उपविभागीय कार्यालयाशी संपर्क साधावा.

‘मागेल त्याला सौर कृषी पंप योजना’ शेतकऱ्यांसाठी एक महत्त्वाची व शाश्वत ऊर्जा स्त्रोत उपलब्ध करणारी योजना आहे. शेतकऱ्यांच्या सिंचनाच्या गरजा पूर्ण करण्यासाठी आणि त्यांच्या आर्थिक भार कमी करण्यासाठी सरकारने ही योजना सुरू केली आहे. पात्र शेतकऱ्यांनी वेळेत अर्ज करून योजनेचा लाभ घ्यावा.

Leave a Comment