Hartalika Tritiya 2025 Vrat Rules:
भाद्रपद महिन्यातील शुद्ध तृतीया तिथीला साजरी केली जाणारी हरितालिका तृतीया (Hartalika Tritiya) ही हिंदू धर्मातील सर्वात पवित्र तिथींपैकी एक आहे. यंदा हरितालिका तृतीया 26 ऑगस्ट 2025 रोजी साजरी होणार आहे. या दिवशी देवी पार्वतीची पूजा करून, अखंड सौभाग्य आणि मंगलमय जीवनासाठी स्त्रिया उपवास धरतात. या व्रताचे काही महत्त्वपूर्ण नियम आहेत, जे पाळल्यासच व्रत पूर्ण मानले जाते. चला तर जाणून घेऊया हरितालिका तृतीया व्रत नियम (Hartalika Tritiya Vrat Rules 2025) –
✅ हरितालिका तृतीया व्रताचे नियम
- व्रत करणाऱ्या स्त्रिया – हे व्रत प्रामुख्याने सुवासिनी स्त्रिया आणि कुमारिका करतात.
- पूजेची देवता – पार्वती देवी ही या व्रताची मुख्य देवता असून ती सर्व मांगल्याचे प्रतीक मानली जाते.
- पूजेची तयारी –
- घरातील जागा स्वच्छ करून पूर्व किंवा पश्चिम दिशेला मुख करून चौरंग मांडावा.
- चौरंगाखाली स्वस्तिक काढावे व रांगोळी सजवावी.
- चौरंगावर शिवलिंग, गौरी व सखी मूर्ती ठेवून गणपतीसाठी सुपारी ठेवावी.
- चौरंगाभोवती केळीचे खांब बांधावे आणि पूजेचा तांब्या डाव्या बाजूला ठेवावा.
- पूजेचे नियम –
- पूजेच्या वेळी साहित्य जवळ ठेवावे जेणेकरून उठावे लागू नये.
- पारंपरिक पोशाख, हळदकुंकू लावून पूजेला बसावे.
- प्राणप्रतिष्ठेनंतर उत्तरपूजेपर्यंत मूर्ती हलवू नयेत.
- देवीवर फुले उडवू नयेत, तर हळुवारपणे अर्पण करावीत.
- पूजेतील विशेष बाबी –
- देवीसमोर विड्याची पाने, सुपारी व श्रीफळ योग्य प्रकारे ठेवावे.
- उजव्या बाजूला दिवा व घंटा, डाव्या बाजूला समई ठेवावी.
- पूजेच्या सुरुवातीला दिवे लावून आरती करावी.
- श्री हरितालिका व्रत कथा वाचावी आणि सर्वांना ऐकवावी.
- व्रताचे नियम –
- उपास करणाऱ्या स्त्रिया दिवसभर उपोषण करतात.
- पाणी देखील न पिता रात्रभर जागरण करण्याची परंपरा आहे.
- व्रतानंतरची कृती –
- पूजा झाल्यानंतर सुवासिनींना खणानारळाने ओटी भरावी.
- दुसऱ्या दिवशी सकाळी उत्तरपूजा करून मूर्ती, फुले आणि पत्री पाण्यात विसर्जित करावीत.
- त्यानंतर पारणे करून व्रत पूर्ण केले जाते.
🌸 हरितालिका तृतीया व्रताचे महत्त्व
मान्यता आहे की, पार्वती मातेनं भगवान शंकराला पती म्हणून मिळवण्यासाठी हे व्रत केलं होतं. त्यामुळे या व्रतामुळे स्त्रियांना पतीचे दीर्घायुष्य, सुख, समृद्धी आणि अखंड सौभाग्य प्राप्त होतं. कुमारिकांना योग्य वर मिळावा यासाठी हे व्रत केले जाते.