बॉलिवूडमधील एक गाजलेला चित्रपट हमारा दिल आपके पास है (Hamara Dil Aapke Paas Hai) नुकताच २५ वर्षांचा झाला. अनिल कपूर, ऐश्वर्या राय बच्चन आणि सोनाली बेंद्रे यांच्या प्रमुख भूमिका असलेला हा चित्रपट सतीश कौशिक यांनी दिग्दर्शित केला होता. या विशेष टप्प्याच्या निमित्ताने अनिल कपूरने सोशल मीडियावर भावनिक पोस्ट शेअर करत या चित्रपटाशी निगडित आठवणींना उजाळा दिला.
अनिल कपूरने सांगितले की, ताल चित्रपटाच्या शूटिंगदरम्यान तो ऐश्वर्याच्या अभिनयाने इतका प्रभावित झाला की त्याने तिचे नाव सतीश कौशिक आणि निर्माता सुरेंद्रनाथ (नायडू साब) यांना सुचवले. सुरुवातीला काही शंका उपस्थित झाल्या होत्या, पण एकदा सतीश कौशिक यांनी ऐश्वर्याला सेटवर पाहिले आणि तिच्या प्रतिभेवर विश्वास बसला.
मात्र, या प्रवासात एक खास किस्सा अनिल कपूरने उलगडला. त्याने लिहिले की, “शूटिंग सुरू होण्याआधी ऐश्वर्याला काही शंका होत्या आणि ती जवळपास या चित्रपटातून बाहेर पडणार होती. त्या वेळी मी आणि सतीश तिच्या घरी गेलो आणि मनमोकळं बोललो. त्या चर्चेनंतर ऐश्वर्याने चित्रपटात काम करण्याचा निर्णय घेतला आणि मला आनंद आहे की तिने तो निर्णय घेतला. तिचा अभिनय अप्रतिम होता आणि चित्रपट सुपरहिट ठरला.”
अनिल कपूरने या पोस्टमध्ये आपल्या जिवलग मित्राचा, दिवंगत दिग्दर्शक सतीश कौशिक यांचा ही विशेष उल्लेख केला. तो म्हणाला, “आज या चित्रपटाचे २५ वर्षे पूर्ण होताना माझे हृदय सतीशच्या आठवणींनी भरून आले आहे. त्याची फार आठवण येते.”
हमारा दिल आपके पास है हा चित्रपट १९९७ च्या तेलुगु चित्रपट पेल्ली चेसुकुंदाम चा हिंदी रिमेक होता. बोनी कपूर यांनी याची निर्मिती केली होती. वर्ष २००० मधील हा सर्वाधिक कमाई करणाऱ्या चित्रपटांपैकी एक ठरला. अनिल कपूर आणि ऐश्वर्या राय बच्चन व्यतिरिक्त या चित्रपटात सोनाली बेंद्रे, अनुपम खेर, पुरी राजकुमार, जॉनी लिव्हर, हिमानी शिवपुरी, मुकेश ऋषी आदी कलाकार होते.
आजही या चित्रपटातील गाणी आणि कथा प्रेक्षकांच्या मनात घर करून बसली आहेत. २५ वर्षांनंतरही प्रेक्षक आणि कलाकारांसाठी हा चित्रपट एक अविस्मरणीय आठवण ठरतो.