गेल्या काही दिवसांपासून सातत्याने सुरू असलेल्या मुसळधार पावसामुळे चांदोली धरणाच्या पाणलोट क्षेत्रात मोठी वाढ झाली असून, धरण पूर्ण क्षमतेने भरले आहे. परिणामी रविवारी (दि. २७ जुलै) सायंकाळी धरणातून वारणे नदीपात्रात १५,०७५ क्युसेकने पाण्याचा विसर्ग करण्यात आला. यामुळे नदीने रौद्ररूप धारण केले असून, नदीकाठच्या अनेक गावांचा संपर्क तुटला आहे.
धरणातून विसर्ग वाढविण्याचा निर्णय जलसंपदा विभागाने पावसाच्या वाढत्या प्रमाणामुळे घेतला. वक्र दरवाजामधून ११,४५० क्युसेक आणि वीजगृहातून ३,६३० क्युसेक पाणी सोडले गेले. सध्या एकूण १५,०७५ क्युसेकने विसर्ग सुरू असून पावसाचा जोर कायम राहिल्यास हा विसर्ग आणखी वाढविण्यात येऊ शकतो, असे प्रशासनाने स्पष्ट केले.
नदीकाठचं जनजीवन विस्कळीत
पाण्याचा वाढता विसर्ग वारणेच्या पाणीपातळीत मोठी वाढ घडवत असून याचा थेट परिणाम नदीकाठच्या गावांवर झाला आहे. शेती पाण्याखाली गेल्याने शेकडो हेक्टरवरील पिकांचं नुकसान झालं. अनेक छोट्या-मोठ्या बंधाऱ्यांवरून पाणी ओसंडून वाहत असल्याने वाहतूक पूर्णपणे बंद झाली आहे. यामुळे स्थानिक नागरिक आणि प्रशासनामध्ये चिंतेचे वातावरण पसरले आहे.
प्रशासनाचा सतर्कतेचा इशारा
नदीकाठच्या गावांना सतर्कतेचा इशारा देण्यात आला असून, नागरिकांनी नदीपात्रात जाणं टाळावं, आपली जनावरे सुरक्षित ठिकाणी हलवावीत, आणि गरज भासल्यास तातडीने प्रशासनाशी संपर्क साधावा, असे आवाहन करण्यात आले आहे. आपत्कालीन परिस्थितीच्या पार्श्वभूमीवर बचाव पथके सज्ज ठेवण्यात आली आहेत.
