मुंबई: बॉलिवूड अभिनेत्री शिल्पा शेट्टी (Shilpa Shetty) आणि तिचा पती राज कुंद्रा (Raj Kundra) यांच्याविरोधात फसवणुकीचा नवा गुन्हा नोंदवण्यात आला आहे. ‘बेस्ट डील टीव्ही’ (Best Deal TV) या टेलिशॉपिंग कंपनीशी संबंधित या प्रकरणामुळे शिल्पा-राज यांच्या अडचणीत भर पडली आहे. मुंबई पोलिसांनी 60.40 कोटी रुपयांच्या फसवणूक प्रकरणी एफआयआर नोंदवला असून दोघांविरोधात लूकआऊट नोटीसही जारी करण्यात आली आहे.
काय आहे प्रकरण?
व्यावसायिक दीपक कोठारी यांनी या प्रकरणात तक्रार दाखल केली आहे. त्यांच्या म्हणण्यानुसार, 2015 ते 2023 या काळात शिल्पा शेट्टी आणि राज कुंद्रा यांनी व्यवसाय विस्ताराच्या नावाखाली 60 कोटी रुपयांची गुंतवणूक मागितली. मात्र हे पैसे व्यवसायाऐवजी वैयक्तिक खर्चासाठी वापरण्यात आले, असा गंभीर आरोप कोठारी यांनी केला आहे.
त्यांनी असेही सांगितले की, एप्रिल 2016 मध्ये शिल्पा शेट्टीने गुंतवणुकीची लेखी हमी दिली होती. पण काही महिन्यांतच तिने कंपनीच्या संचालकपदाचा राजीनामा दिला. नंतर कंपनीविरोधात 1.28 कोटी रुपयांचे दिवाळखोरीचे प्रकरण सुरू असल्याचे समोर आले.
‘बेस्ट डील टीव्ही’ काय होती?
मार्च 2015 मध्ये सुरू झालेली Best Deal TV ही सेलिब्रिटी-आधारित टेलिशॉपिंग वाहिनी होती. यामध्ये शिल्पा शेट्टी आणि राज कुंद्रा यांची 63% हिस्सेदारी होती, तर बॉलीवूड अभिनेता आणि शिल्पाचा माजी प्रियकर अक्षय कुमारकडे 8% हिस्सा होता. तक्रारदार दीपक कोठारीकडे 26% हिस्सा होता.
ही कंपनी मुख्यत्वे कॅश ऑन डिलिव्हरी (COD) मॉडेलवर चालत होती. मात्र, 2016 मध्ये झालेल्या नोटाबंदीमुळे कंपनीला मोठा फटका बसला. फक्त 18 महिन्यांतच कंपनीला सुमारे 100 कोटी रुपयांचे नुकसान सोसावे लागले.
डिसेंबर 2016 मध्ये राज कुंद्राने कंपनीच्या सीईओ पदाचा राजीनामा दिला आणि नोटाबंदीमुळे व्यवसाय डबघाईला आला असल्याचे सांगितले. कंपनी बंद पडल्यानंतरही कोठारी यांना त्यांचे पैसे परत मिळाले नाहीत. शेवटी त्यांनी कायदेशीर मार्गाचा अवलंब केला.
पुढे काय?
सध्या मुंबई पोलिस या प्रकरणाची चौकशी करत आहेत. शिल्पा शेट्टी आणि राज कुंद्राविरोधात लूकआऊट नोटीस जारी करण्यात आली आहे. त्यामुळे या वादग्रस्त प्रकरणाचा पुढील तपास कसा होतो, याकडे सर्वांचे लक्ष लागले आहे.