पुणे : मराठी रंगभूमी आणि चित्रपटसृष्टीतील ठसठशीत अभिनयासाठी प्रसिद्ध असलेल्या ज्येष्ठ अभिनेत्री ज्योती चांदेकर (वय ६८) यांचे शनिवारी खासगी रुग्णालयात निधन झाले. त्यांच्या निधनामुळे नाट्य व चित्रपटसृष्टीवर शोककळा पसरली आहे. त्यांच्या पार्थिवावर रविवारी सकाळी अकरा वाजता पुण्यातील वैकुंठ स्मशानभूमीत अंत्यसंस्कार होणार आहेत.
ज्योती चांदेकर यांनी नाट्यसंपदा संस्थेच्या ‘बेईमान’ नाटकात नटश्रेष्ठ प्रभाकर पणशीकर आणि सतीश दुभाषी यांच्यासह रंगभूमीवर आपली छाप पाडली. ‘आमदार सौभाग्यवती’ या लोकप्रिय नाटकातून त्यांनी प्रेक्षकांच्या मनात अढळ स्थान निर्माण केले. ‘मी सिंधूताई सपकाळ’ या चित्रपटात अनाथांची माय साकारणाऱ्या त्यांच्या भूमिकेला प्रचंड प्रशंसा मिळाली.
‘रखेली’, ‘मादी’, ‘जंगली कबुतर’ यांसारख्या बोल्ड विषयांवरील नाटकांमध्येही त्यांनी प्रभावी भूमिका साकारल्या. त्यांच्या अभिनयाची ताकद म्हणजे त्यांचे ठसठशीत व्यक्तिमत्त्व, भेदक डोळे आणि करारी आवाज.
ज्योती चांदेकर या मूळच्या पुण्याच्या. त्यांच्या अभिनय प्रवासाची सुरुवात अगदी योगायोगाने झाली. वडिलांसोबत अमिताभ बच्चन यांच्या ‘एक नजर’ चित्रपटाचे चित्रीकरण पाहण्यासाठी गेल्या असताना दिग्दर्शकाने त्यांना काही संवाद वाचायला दिले. त्यांनी ते सहज वाचले आणि त्यांच्याकडून अभिनय करवून घेतला. याच क्षणापासून त्यांच्या कारकिर्दीची सुरुवात झाली.
अनंत ओक यांनी ‘सुंदर मी होणार’ नाटकासाठी त्यांची निवड केली. त्यानंतर बाबुराव गोखले यांच्या ‘करायला गेलो एक’, ‘वऱ्हाडी माणसं’, ‘स्वयंसिद्धा’ अशा नाटकांमध्ये त्यांनी महत्वाच्या भूमिका केल्या.
त्यांच्या मागे दोन मुली असून, प्रसिद्ध अभिनेत्री तेजस्विनी पंडित या त्यांची कन्या आहे. ज्योती चांदेकर यांचे योगदान मराठी रंगभूमी, नाटक व चित्रपट यांना सदैव स्मरणात राहील.