महाराष्ट्रात पुन्हा एकदा पावसाने जोर पकडला आहे. हवामान विभागाने 12 ऑगस्टसाठी राज्यातील 16 जिल्ह्यांना यलो अलर्ट जारी केला आहे. ताशी 30 ते 40 किमी वेगाने वारे वाहण्याची शक्यता असून, अनेक ठिकाणी हलका ते मध्यम पाऊस तर काही ठिकाणी जोरदार पावसाचा अंदाज वर्तवण्यात आला आहे.
मुंबई आणि कोकणात पावसाची जोरदार शक्यता
मुंबई शहर व उपनगरात दिवसभर ढगाळ वातावरण राहणार असून, काही ठिकाणी गडगडाटासह हलका ते मध्यम पाऊस होऊ शकतो. मुंबईचे कमाल तापमान 32 अंश सेल्सिअस तर किमान तापमान 25 अंश सेल्सिअसच्या आसपास असेल.
मुंबईसह पालघर, ठाणे, रायगड, रत्नागिरी आणि सिंधुदुर्ग या जिल्ह्यांमध्ये पावसाची शक्यता आहे. पालघर वगळता उर्वरित जिल्ह्यांना यलो अलर्ट जारी करण्यात आला आहे.
पश्चिम महाराष्ट्रात पावसाचा अंदाज
पुण्यात दिवसभर ढगाळ वातावरणासोबत तुरळक ठिकाणी हलक्या ते मध्यम पावसाची शक्यता आहे. सातारा व कोल्हापूर जिल्ह्यांना हवामान विभागाने यलो अलर्ट दिला आहे, तर सांगली व सोलापूरमध्ये अधूनमधून पावसाची शक्यता आहे.
उत्तर महाराष्ट्रातील हवामान
नाशिक, धुळे, जळगाव, नंदुरबार व नगर जिल्ह्यांत ढगाळ वातावरण राहील. काही ठिकाणी हलक्या ते मध्यम पावसाची शक्यता वर्तवण्यात आली आहे.
मराठवाड्यात पुन्हा पावसाचा जोर
धाराशिव, लातूर, नांदेड व बीड या जिल्ह्यांना यलो अलर्ट जारी करण्यात आला आहे. तसेच, छत्रपती संभाजीनगर, जालना, परभणी व हिंगोली येथेही मध्यम पावसाची शक्यता आहे.
विदर्भात वादळी वाऱ्यासह पाऊस
विदर्भातील यवतमाळ, नागपूर, चंद्रपूर, भंडारा, गोंदिया आणि गडचिरोली या जिल्ह्यांना यलो अलर्ट जारी करण्यात आला आहे. या भागांत वादळी वाऱ्यासह जोरदार पावसाची शक्यता हवामान विभागाने वर्तवली आहे.
हवामान तज्ज्ञांच्या मते, या कालावधीत नागरिकांनी प्रवास करताना खबरदारी घ्यावी, पूरप्रवण भागांपासून दूर राहावे आणि हवामान विभागाच्या सूचनांचे पालन करावे.