ठाणे: एसटी महामंडळाची आर्थिक परिस्थिती सध्या अत्यंत नाजूक झाली आहे. प्रवासी तिकीट विक्रीवर अवलंबून राहिल्यास ही संस्था दीर्घकाल टिकू शकणार नाही, याची जाणीव शासनाला झाली आहे. त्यामुळे उत्पन्नाचे नवीन स्त्रोत निर्माण करण्यासाठी महत्त्वपूर्ण निर्णय घेण्यात आला आहे.
परिवहन मंत्री आणि एसटी महामंडळाचे अध्यक्ष प्रताप सरनाईक यांनी माहिती दिली की, राज्यभरात एसटीच्या मालकीच्या जागांवर व्यावसायिक तत्वावर पेट्रोल आणि डिझेल विक्री करणारे पंप सुरू करण्यात येणार आहेत. या उपक्रमातून महामंडळाला उत्पन्नाचे स्थिर आणि दीर्घकालीन स्रोत मिळणार आहेत.
गेल्या ७० वर्षांपासून एसटी महामंडळ इंडियन ऑईल, भारत पेट्रोलियम, हिंदुस्तान पेट्रोलियम यांच्याकडून स्वतःच्या बसेससाठी इंधन खरेदी करत आहे. महामंडळाकडे सध्या राज्यभरात २५१ ठिकाणी मालकीच्या जागा असून तिथे इंधन वितरणाचे पंप कार्यरत आहेत.
आता या अनुभवाचा फायदा घेत, सर्वसामान्य नागरिकांसाठी देखील पेट्रोल-डिझेलची विक्री सुरू केली जाणार आहे.
व्यावसायिक भागीदारी आणि नियोजन:
या योजनेसाठी केंद्र सरकारच्या अखत्यारितील इंधन कंपन्यांसोबत व्यावसायिक करार करण्यात येणार आहे. प्रत्येक पंपासाठी २५ बाय ३० मीटर जागा निश्चित करण्यात आली आहे.
‘पेट्रो-मोटेल हब’ संकल्पना:
हे पंप केवळ इंधन विक्रीपुरते मर्यादित राहणार नाहीत. येथे रिटेल शॉप्स आणि आरामासाठी मोटेल हब देखील तयार केले जाणार आहेत, ज्यामुळे इतर व्यावसायिकांनाही उपक्रमात सहभागी होता येणार आहे.
पारदर्शक महसूल आणि भविष्यकालीन योजना:
हा संपूर्ण करार केंद्र आणि राज्य सरकारच्या नियंत्रणाखाली असल्याने उत्पन्नाचे वितरण पारदर्शक असेल. भविष्यात एसटी महामंडळाचे हे इंधन वितरण केंद्र विश्वासार्ह ब्रँड म्हणून उभे राहतील आणि महामंडळाला आर्थिकदृष्ट्या बळकटी मिळेल.
परिवहन मंत्री प्रताप सरनाईक म्हणाले, “हा निर्णय एसटीच्या टिकाऊ भविष्यासाठी घेतला असून, व्यावसायिक इंधन विक्रीतून महामंडळाला उत्पन्नाचे नवीन आणि स्थिर स्रोत निर्माण होतील.”